لا تخرج من البيت

السلام عليكم ورحمه الله وبركاته
الموضوع ده انا بكتبه نصيحة للناس فى هذه الايام التى لا تملك سيارات

فبعد تطبيق قانون المرور الجديد أصبح وجود مواصلات محترمة أو حتى غير آدمية امر صعب جداً وده امر متوقع طبعاً من كثرة الفهلوية والمخالفين من السائقين وهنحتاج لوقت شوية كزبائن للتاكسيات لحد لما السواقين يوفقوا أوضاعهم واللى مش مطلع رخصة يطلع واللى معاه خاصة يقلبها مهنية والعيال الصغيرة اللى سايقة تاكسيات تستنى شوية لما تكبر .... باختصار لما نبطل عشوائية وفهلوة مصريين

انا بقول الكلام ده لانى امبارح تعرضت لموقف صعب جداً فبعد انا ركبت تاكسى من عند البيت لوسط البلد والله وحده اعلم انتظرنا وقت كبير فى الشارع وكان معاى زوجتى وبنتى (10 شهور ونص ) وكمان أختى وابنها( سنة وكام شهر) وكنا رايحين لدكتورة الاطفال بالعيلين دخلنا حجزنا عند الدكتورة والعيادة مش ممكن كأن مفيش حد من الاطفال سليم الناس مقفله العيادة وواقفين بره على السلالم وكانت الدكتورة لسه جايه وحجزنا وكان رقمنا 37 و38 طبعاً مش هنستنى كل ده قولنا ننزل نصلى العشاء ونتسوق ونرجعلها بعد كده ....

رجعنا بعد ما تعبنا من شيل العيال وبكائهم وشرب العيال ميع علشان العيال عطشانة والجو حر ..... الى اخره

ورجعنا على الدكتورة ولقينا لسه الكشف عند رقم 21 وقبله اتنين الظاهر استشارة فقلنا نمشى دلوقتى ونحجز تانى يوم طلعت الدكتورة اجازة بكرة وبعده والجمعة اجازة فقولنا نحجز للسبت وامرنا لله .... نزلنا شربنا حاجة ساقعة علشان الحر وجبت عصير وبنتى دلقيت العصير كالعادة علىّ وعلى نفسها .... فضلنا واقفين نستنى تاكسى مفيش واحنا على شارع رئيسى قولنا نتمشى شوية عند تقاطع كده مليان اشارات اهو نلاقى تاكسى جاى من اى اتجاه فلقينا الكل بيفكر بنفس المنطق !!! ناس كتير كله عمال يرفع ايده ويصفر ويجرى ورا التاكسيات زى الــــ .....

فضلنا واقفين كتييييييييييييير وعسكرى المرور لمح تاكسى ماشى فاضى راح موقفه غصب عنه لواحدة ست فالست راحت تركب فطبعاً السواق متضايق انها هتركب غصب عنه والست زهقانة من الوقفة فى الشارع هى وبينتها الصغيرة ياعينى .... فطبعاً خناقة بينها وبين السواق .... والسواق يقول هو انا حمار تركب وتقولى حاا وهى تقوله انت سألتنى راحه فين قولتلك ... رديت عليا وبتقولى انت زعلانة ليه ... طيب انت مالك زعلانة ولا مش زعلانة .... وطبعاً وكالعادة الفضوليون والعيال الصغيرة والكبيرة وعسكرى المرور كلهم التفوا حول العربية وبرضوا فى الآخر ركبت الست غصب عنه واخدت رقم العربية معاها احتياطى علشان لو عمل فيها فصل ولا حاجة فى السكة ...

طبعاً انا بعد لما عدى علىّ حوالى 20 دقيقة كنت خلاص هتجنن مريم (بنتى) وعبد الملك (ابن اختى) بكاء مستمر من الحر والكلاكسات والزعيق والخنقة وانا بحاول احل الموقف مش عارف ... كنت بشاور لاى حد واشاور لتاكسيات فى اى اتجاه وبرضوا مش نافع تاكسيات قليلة جداً واللى موجود مليان ناس زى الاوتوبيس .... فربنا الهمنى انى اتصل بواحد صاحبى معاه تاكسى فاتصلت بيه قالى انا جنبك عشر دقائق واكون عندك ... عشر دقائق ربع ساعة وجاء ....

مش هقولكم فرحتى كانت اد ايه ... ولا ضهرى ورجلى كانوا وجعنى اد ايه ...

وكان ميعاد الكشف بتاعنا لو رجعنا للدكتورة ينفع ندخل علطول لاننا اتأخرنا فى الشارع بس لو كنا رجعنا للدكتورة تانى مضمنش صاحبى يرجعلى تانى ففضلنا الرجوع للبيت بكرامتنا أفضل ومش مهم نبقى نروح الصبح نكشف فى اى يوم ومش عارف ازاى هنأجل المرض بس هو ده اللى حصل غصب عنا !!!

سألته هو ايه اللى حصل فين التاكسيات ؟

قالى بص حوالى 30% من السواقين بتوع التاكسيات معاهم رخص خاصة مش مهنية !!! فطبعا سلم العربية لصاحبها وشكراً

وناس تانية الرخص منتهية وناس عربيتهم هى اللى منتهية الصلاحية .... فقالى مش هتلاقى غير العربيات المظبوطة فقط هى اللى ماشية فقلت سبحان الله احنا عايشين فى فوضى وربنا اعلم بينا وبحالنا

امال الناس دى كلها كانت ماشية ازاى لحد 30/7/2008 ؟؟؟؟

طبعاً انا مش ضد الحزم تجاه المخالفين والفهلوية بس يبقى الكل سواسية أمام القانون (ماشى).... بس المشكلة كلها جت على دماغ المواطن كالعادة واترمى فى الشارع لا يجد من يحمله ....

قانون المرور بالنسبة لاصحاب السيارات :- هوريك العين الحمره

قانون المرور بالنسبة للمواطنين :- لا تخرج من البيت

سلام