لحم هوهو و حمير

السلام عليكم ورحمه الله وبركاته
الموضوع ده علشان نبقى عمليين وواقعيين !

نعم ممكن اى واحد فينا يحصله !

يأكل لحم .... حمير أو كلاب او اى حاجة تانية الله أعلم

كيف تعرف لحم الحمير؟

وسائل التعرف على لحوم الحمير :-

توضيح من الدكتور حامد سماحة رئيس الهيئة العامة للخدمات البيطرية عند فضح الجزارين يوم 13-3-2008 فى برنامج العاشرة مساءاً

1. 
   
   ان عضلاتها تكون رفيعة للغاية وليست سميكة مثل الابقار والجاموس


2. 
   
   اضافة الى ان لونها يكون داكنا و لو تعرضت للهواء يتحول لونها الى ما يشبه صدأ النحاس


3. 
   
   أما لو تم طبخها فيكون طعمها (مسكر )


4. 
   
   وتبدو مرقتها وكأن بها بقع دهنية واذا ما تم لمس هذه الدهون فيشعر المرء وكأنه غمس يده في زيت


5. 
   
   بالاضافة للشكل العام للحيوان المذبوح


6. 
   
   اما اذا تم طبخها بالفعل او فرمها فلن يتم التعرف عليها بالفحص الظاهرى الا لو اخذ منها عينة للتحليل

وقال إن الطريقة الوحيدة لضمان الحصول على لحم سليم طبيا وصحيا هو محلات الجزارة الموثوق فيها تماماوالمعروف مصدرها تماما وعليها كافة اختام السلخانة بما يدل على ذبحها والكشف عليها والتأكد من سلامتها.

البند الاول والثالث والرابع ممكن يكون فيهم صعوبة شوية لان الاول يتعلق بشكل العضلات ودى الجزار مش هيخليك تقف تتفرج كده وتبحلق فى اللحمة اما الثالث والرابع فالطعم مقدور عليه بالبهارات والذى منه..

اما بخصوص البند الثانى فأعتقد انه واضح يعنى فعلاً لون اللحم البقرى والجاموسى بيبقى احمر داكن اما بنى او نحاسى ده فتعرف انه هوهوهوهو

البند الخامس وده يبقى واضح لو الذبيحة معلقة بكاملها ودلوقتى ابتديت أفهم ليه الجزار بيسيب ذيل الجاموسة كما هو متصل باللحمة وبيرميه فى الآخر بعد لما يخلص بيع اللحمة، علشان يبقى دليل ان ديه لحم جاموسى مش هوهو

البند سادسا ده مصيبة سوده سوده يتلخص فى كلمة حوواشى هوهو .... لما واحد يلاقى مكتوب على فاترينة حوواشى ان السندوتش بنص جنية طيب تفتكر اللى هياكل السندوتش ده مفكرش هو اللحمة بتاعتوا من ايه ؟ مهو أكيد عارف انها هوهو بس هو فقير وعاوز حاجة تسد جوعه وخلاص وهى موته ولا اكتر ... انا عن نفسى مفتكرش انى أكلت حوواشى من بره البيت ولا هكلها

طيب ومحلات الكباب ؟ هتقولى دول بيبعيوا السندوتش غالى وبيكسبوا كويس فايه اللى هيخليه يجيب لحم هوهو؟ أقولك الجشع ياأخى والبحر يحب الزيادة...

انا قرفان جداً من السيرة دى بس هنعمل ايه لازم تحاول تبقى صاحى شوية وتتعرف على وسائل النصب علشان تتجنبها واحساس داخلى كده ان الستة بنود دى ممكن فبركتها وربنا يستر علينا ....

الا ايه اللى فكرنى بالموضوع ده من يوم 13-3-2008 حتى الآن

شوف الخبر ده وانت تعرف:-

المصدر موقع مصراوى نقلاً عن جريدة البديل

وزارة الزراعة تصدر 7300 قطعة جلد حمير للصين أغسطس/9/2008 10:14:00 PM
القاهرة- وافقت الهيئة العامة للخدمات البيطرية، التابعة لوزارة الزراعة، علي تصدير 7 آلاف و300 قطعة جلد حمار خلال 3 أشهر، ووافقت الهيئة علي تصدير 4600 قطعة جلد حمار أخري في أقل من شهر.
وقال خطاب موجه من رئيس الإدارة المركزية للحجر البيطري والفحوص إلي مدير عام الإدارة العامة للحجر البيطري: "نحيطكم علماً بأنه قد صدرت الموافقات لتصدير جلد حمير من شركة «الحجاز» إلي الصين".
وكشف الخطاب عن تصدير 7300 قطعة جلد حمار خلال 3 أشهر، ففي 6 مارس 2008 وافقت الهيئة العامة للخدمات البيطرية التابعة لوزارة الزراعة علي تصدير 2300 قطعة جلد حمير، وفي 1 أبريل الماضي وافقت الهيئة علي تصدير 2300 قطعة جلد حمار أخري، وأكد الخطاب أن الهيئة أصدرت موافقة ثالثة رقم 484 لنفس الشركة في 21 يناير 2008 لتصدير 2700 قطعة جلد حمار.
من جانبه قال الدكتور حامد سماحة، رئيس الهيئة العامة للخدمات البيطرية، في تصريحات للبديل: "لا أعرف أين تذهب لحوم هذه الحمير المذبوحة لكنني لا أستطيع إيقاف التصدير لأنه يدخل عملة صعبة للبلد». وأشار إلي أن هذه الحمير لا تذبح تحت إشراف الخدمات البيطرية.
من ناحية أخري قال الدكتور سامي البساطي، رئيس الجمعية المصرية لعلم الحيوان، إن هذه الكميات المصدرة تثير الشك، فكيف تتم الموافقة علي تصدير أكثر من 4 آلاف قطعة جلد حمير في أقل من شهر وأين تذهب لحوم الحمير المذبوحة، فحديقة الحيوان هي الجهة الوحيدة المسموح لها بذبح الحمير والحديقة لا تذبح أكثر من 10 حمير يومياً، وبالتالي فالمعدل الشهري يقدر بـ 300 قطعة جلد حمير فقط.
وتساءل د. سامي: كيف يعطي رئيس الهيئة العامة للخدمات البيطرية موافقات دون أن يعلم بأماكن ذبح هذه الحمير؟