شغل طفى حريقة ده مبحبوش
وكان بيقول لازم تتصرف قبل الحريقة مش لما العملية تولع تفضل تفكر تجرى من هنا ولا من هنا ولا تطفيها ازاى وتفضل نايم تشخر ومتقومش من مكانك الا لما تسمع انذار الحريق وكان يصر ان يبقى فيه برنامج للاسبوع بالنسبة لزيارة العملاء وبرنامج لفتح سوق مع عملاء جدد ومراجعة عملاء قدامى وبرنامج اخر للصيانة الدورية وكل شيىء يبقى مكتوب ويدخل واحد واحد من العاملين يناقش برنامجه معاه ويتراجع بمنتهى الدقة وكانت شركة صغيرة مش متوسطة كمان بس صاحبها كان بيشتغل فى شركات كبيرة وكان مخه فيه سيستم للشغل .....
افتكرت كل ده لما سمعت عن حريق مجلس الشورى حسيت فعلاً اننا عندنا تخلف إدارى بشكل لافت للنظر ومحدش يقدر ينكره والتخلف ده موجود على مستوى الفرد اللى هو انا وانت وعلى مستوى المجتمع ومؤسساته ..
لما كنت فى كلية تجارة جامعة حلوان كان عندنا دكتور اسمه على حلوة وكان دايماً يقول مشكلة مصر فى الادارة
كل لما يحصلى موقف على المستوى الشخصى وأسيىء التصرف إدارياً افتكر كلامه علطول ........
يعنى بافتراض ان فيه اتنين مرتبهم واحد ومسئولياتهم واحدة وهما الاتنين فلوسهم حلال علشان تبقى بركتها واحدة ماشى، واحد فيهم مرتبه بيكفيه لاخر الشهر وواحد تانى بيكفيه لحد 15 منه طب تفتكر ليه؟ أكيد واحد فيهم إدارجى لو عاوز يخرج مثلاً هو والعيله بيعمل حسابه يصحى بدرى شوية يفطر فى بيته براحته ويركب اوتوبيس بدل ما يركب تاكسى بالشيىء الفلانى والتانى نايم كسلان بيصحى جرى فى جرى بيركب تاكسى ويفطر تيك اواى (وخلى بالك من هوهو) وحاجات كتير لاحظها كده فى نفسك وانت تعرف، بجد فكر كده هتلاقينا ملخبطين فى حاجات كتير وقليل فينا قوى اللى بيعرف يخطط ويدبر ولو لاقيته بتلاقيه دايما محل تقدير واحترام من كل اللى حواليه ودايما يسأل ويترجع ليه لما تكون تايه ومش عارف تفكر !!!
طيب بص انت فكرت فى بيتك انت مستوى الامان عندك ايه ؟ أنبوبة بوتجاز سخان فيش كهرباء دفاية مروحة الخ الخ الخ بالله عليك فكرت فيها ؟ ولا مستنى تطفى حريقة ؟ احنا كده ايوه احنا كده !!! ياعم ربنا يستر مش كده ان شاء الله مش هيحصل حاجة
تفتكروا لما واحد فينا يمسك إدارة مبنى مهم زى ده هيعمل فيه ايه ؟؟؟طيب نفكر كده مع بعض بشويش
1- المبنى ده قيمته المادية والتاريخية صغيرة ولا كبيرة ؟ كبيرة جداً طبعاً
بالنسبة للمادية مبنى بيدخله وزراء والذى منه لازم يكون أثاثه وتجهيزاته وتكيفاته وحماماته وسمعياته وبصرياته وأرضياته وسقفياته فخمياته فخمياته فخمياته صح
وبالنسبة للتاريخية فاللى عرفته انه مبنى من أيام الملك فاروق أيام الجنية الجبس زى ما بيقولوا
أكد عبد الله العطار مستشار المجلس الاعلى للاثار لشئون الاثار الاسلامية ان مبنى مجلس الشورى الذى تعرض للحريق يعد أثرا إسلاميا حيث انه مسجل ضمن الاثار الاسلامية بقرار رئيس مجلس الوزراء رقم 910 لسنة 1987 ويخضع المبنى لقانون 117 لسنة 1983 الخاص بحماية الاثار .واضاف العطار فى تصريح له الى أن مبنى مجلس الشورى يعد تحفة معمارية ذات عمارة اسلامية متميزة و زخارف وعناصر معمارية بديعة. وأشار إلى أن مبنى مجلس الشورى عقب تسجيله اثرا اسلاميا خضع لخطة ترميم معمارى دقيق وسجل تسجيلا اثريا ومعماريا وفنيا دقيقا بمركز تسجيل الاثار التابع للمجلس الاعلى للاثار ، موضحا ان امكانية خضوع المبنى بعد الحريق للترميم مسألة ممكنة فنيا .
2- هل يوجد تأمين أمنى للمبنى من الخارج ضد السرقة والمتطفلين والمتظاهرين وغيره ؟ بالطبع الاجابه معروفة ترسانة يا أستاذ وهو ده مستوى تفكيرنا أمن مستتب وخلاص
3- هل يوجد تأمين للمبنى من الداخل ضد الحريق مثلاً ؟ هذا ما كشف عنه الحريق وكان منتهى التخلف عدم وجود أجهزة انذار او أجهزة إطفاء آلى او أى حاجة من دى ولو كانت موجود مشتغلتش ليه ؟ ولا هتبقى من نفس توكيل طفايات الحريق المضروبة اللى تشتريها غصب عنك ولما تتزنق فى يوم وتلاقى حريقة تيجى تستعملها تلاقيها فالصو .. بالرغم من انه بيدخله وزراء ورجال اعمال وناس كبيرة وبتفهم يعنى لو مش خايفين على المبنى اهو يخافوا على نفسهم بس برضوا محدش ليه دعوة وانا مالى يكش يولع ... اهو ولع يا اخويا
4- الجملة دى اخدتها من على موقع الجزيرة "يذكر أن من أشهر الحرائق التي شهدتها مصر هي حريق مكتبة الإسكندرية وحريق دار الأوبرا وحريق قصر ثقافة بني سويف الذي راح ضحيته 29 شخصا" محدش أخد باله ان اى مبنى معرض للحريق ومش معصوم ولا حاجة من المصايب اللى قبل كده
5- أدخل بقى على مبانى تماثله فى الاهمية أو أقل شوية مثلاً مبنى الارشاد والمتحكم فى قناة السويس مجلس الشعب اللى جنب مجلس الشورى وزارة كذا ووزارة كذا الجمارك المطارات الفنادق مجمع التحرير مديريات الامن والسجون مول سيتى موت وغيره وغيره نظامها ايه طيب بلاش المدارس اللى مكدسة بالعيال وكلها كراسى ودكك خشب فى خشب ايه نظامها الواحد بيخاف يدخل اى مبنى كبير مقفول من اللى بيشوفوه
معندناش عقاب عادل يطبق على الكل ايا كان وظيفة المسئول
وثانيا معندناش فهم مناسب للازمات والطوارىء الجهل بعيد عنك
ثالثا سلبية واناملية مطلقة وغياب ضمير رهيب
سلام
ليست هناك تعليقات:
إرسال تعليق