امبارح كنت راكب تاكسى وكان راكب جنبى واحد على يمينى وواحد فى الكرسى الامامى وسواق التاكسى
وقفنا فى اشارة فالراجل اللى جنبى كان عاوز ينزل فى الشارع المجاور للاشارة ففتح الباب مرة واحدة علشان ينزل من غير ما يبص وراه فطبعاً جت عربية بيجو 7 راكب ملاكى ودب خبطت فى الباب اللى اتفتح !!!!!
وكانت العربية يقطنها واحد اسمرانى كده ورفيع ومعاه واحدة ست وولد صغير
فالراجل اللى جنبى غلطان طبعاً لان أبسط حاجة كان يعملها انه يبص وراه قبل ما يفتح الباب فقولت هينزل يعتذر ولا يقول كلمة حلوة تهدى الراجل بتاع البيجو .........
لأ ازاى لازم فهلوة المصريين نزل وخدوهم بالصوت بعد ما بص بصة كده على العربية كويس وشاف ان فيها راجل واحد
الراجل بتاع البيجو بيقوله بكل أدب وصوت واطى وهادى كده هقولك ايه بس ولا اعملك ايه ؟ ومتأثر قوى وهو بيقولها وتحس كده انه غلبان ومفوض امره لله وخلاص ( قدر الله وماشاء فعل )
راح الغلطان اللى جنبى بزعيق وصوت عالى شوية وبعنف قاله تعملى ايه يعنى ايه عاوز تعمل ايه انت اللى جاى بسرعة وفتح الباب وبقى نصه بره فى الشارع وسايب رجله الشمال معايا فى العربية كده وعمال يشوح كأنه مش غلطان راح السواق بتاعنا لف له وقاله انت بتقوله جاى بسرعة ازاى يا بنى ادم والاشارة مقفولة انت اللى كان لازم تبص وراك وانت اللى غلطان
فبكل بجاحة قالوا لا انا بصيت وهو اللى كان جاى بسرعة والحقيقة انا كنت قاعد جنبه ومشفتوش بص ولا لأ ؟
فالناس سكتتهم هما الاتنين والاشارة فتحت والكلاكسات اشتغلت كأنها بمب العيد كل واحد ايده على الكلاكس مش راضى يسيبه كأنه لزق فى ايده
طبعاً انا قولت الموضوع خلص والناس سكتت الاتنين والراجل اللى جنبى لسه سايب رجليه جوه العربيه والكوتشى فيها منورها
-------------------------------------------
فاصل قبل المعركة
------------------------------------------
راحت الست البيجو
قصدى اللى كانت قعدة جنب الراجل فى العربية البيجو استلمت دور البطولة وابتدت هى تتكلم وياريتها كانت قعدت ساكتة ياريتها
عارفين لما تكون نار خمدت خلاص وخلاص هتطفى اهى خلاص ثوانى وتخلص
وانت تروح جايب بنزين وتحطه فوقيها اهو ده اللى حصل .... الست ولعتها لما لقت الراجل اللى كان معاها لم الموضوع
قالت للراجل الغلطان دى طبعا بعد لما نزلت من العربية ولفتله واخدت وضع استعداد وتشكيل هجومى ولا أروع من كده
قالتله ان بقى اللى هروح معاك فى اى خراراة تاخدك (خرارة = مصيبة ) ده احنا لسه مصلحين العربية
قالها تصدقى بقى انت ست مش تمام
قالتلوا انا مش تمام يا ............................... ويا ........... ويا .................................
ده انا هطلع دين .....................
قالها انتى هطلعى دين .....................
تصدق بقه انت راجل مش تمام لما تخلى الست اللى معاك هى اللى تتكلم وانت واقف كده ( ده الغلطان بيقول للراجل البيجو )
راح واحد بن حلال وقف بينها وفضل يهدى فيهم تانى راح الراجل الغلطان اخيراً طلع رجله الشمال من العربية ورجع للوراء شوية واخد وضع الاستعداد راحت الست قالتله انا اللى هضربك يا ......................
وراحت لفت لفة كاملة بسرعة شديدة الدوران حول العربية اللى انا فيها وقلعت الشبب وهى بتجرى عليه وهب
راح هو كمان قلع الكوتشى اللى كان فى رجله وهب
وهب
وهب
الراجل البيجو والراجل الغلطان والست ام شبشب متعرفش مين بيضرب مين
بصراحة كتر الف خيرك يا بنزين
قصدى
ياست
وطبعا العربية اللى انا فيها تم احاطتها من جميع الجهات بعيال صغيرة وعيال كبيرة ومحبى المصائب وشباب البلوتوث وكاميرات الموبيل والفضوليون وسواقين التاكسيات الخ الخ الخ وانتوا عارفين بقى المصريين والاشارة اتقفلت طبعاً والكلاكسات اشتغلت تانى
والعيال الصغيرة عمالين على صوت الكلاكسات يغنوا ويطنططوا وهوا هو وهوا هو
وهوا هو وهوا
هو وهوا هو وهوا هو
وكل لما واحد يشوف واحد فى الخناقة يقوله فيه ايه يلا مين بيتخانق معاك يقولوه مش انا ده واحد بيتخانق مع واحده ست
بس والناس سكتتهم وخلصت
------------------------------------
فاصل بعد المعركة
-----------------------------------
هى لو الست لو (لو يعنى ) سكتت كان حصلها حاجة !!!
صحيح هى ضربتوا بالشبشب بس هو برضوا ضربها بالكوتشى والراجل اللى كان معاها اخد كام بوكس وضربلوا كام بوكس وبعدين برضوا اتلمت ومشيوا !!! يعنى مكنش ينفع من الاول يا بنزين ....
ونستفيد من هذا الموضوع :-
- لما تيجى تنزل من العربية بص وراك الاول لمصلحتك ومحدش عارف البلد مليانة شباشب
- لما تركب عربية بيجو ما تركبش ستات معاك ولو ركبت ابقى طلع لسانها واربط عليه حزام الامان
- لما تلاقى الاشارة حمرا متوقفش احسن حد يخبطك من ورا امشى علطول وادعيلى ... ومتوقفش فى مزلقان فى مرسى مطروح أبداً
- لو انتى ست أحسن حاجة تعمليها فى المواقف دى تسكتى وتهدى جوزك وتدعي لجوزك ان الشيطان ميسطرش عليه
- الشبشب بيوجع اكتر من الكوتشى بكتييييييييييير يا رجاله ...... كان واضح على الراجل الغلطان كده
- اول لما تلاقى زوجتك ابتدت تكلم فى الخناقة سكتها ولم الموضوع وامشى لان كل الناس هتغلطك
نصيحة بجد بقى:-
قل أعوذ بالله من الشيطان الرجيم وربنا ان شاء الله باليقين هيرفع الغضب والشيطان عنك
كما بين النبى صلى الله عليه وسلم
ليست هناك تعليقات:
إرسال تعليق