كيفية البحث عن المدونات

السلام عليكم ورحمه الله وبركاته

كنت عاوز اعرف ازاى أبحث عن مدونات فى بلد معينة ولقيت الرابط ده
ممكن تبحث من خلاله على المدونات المكتوبة باللغة العربية مثلا وفى خلال فترة محددة وخلافه
وده بدل ما تفضل تدوس ( المدونة التالية) وتطلعلك مدونات بطريقة عشوائية كده
الرابط هنا

سلام

معندناش سيستم ولا ايه ؟

السلام عليكم ورحمه الله وبركاته
الخبر ده لفت نظرى على موقع مصراوى اليوم لسبب هقوله بعد الخبر:-

تأجيل محاكمة الضابط وأمين الشرطة المتهمين بتسهيل هروب رجل أعمال لخارج البلاد 7/27/2008 8:37:00 PM

الإسكندرية-محرر مصراوي- قررت محكمة جنايات الإسكندرية تأجيل محاكمة مقدم وأمين شرطة المتهمين بتهريب رجل أعمال ممنوع من السفر لخارج البلاد لجلسة 24 سبتمبر لسماع مرافعة الدفاع عن المتهمين وشهود الإثبات.

عقدت المحكمة جلستها برئاسة المستشار محمد ابو المكارم وعضوية المستشارين محمد حمدي واشرف الشوادفي وسكرتارية محمد صالح .

كانت التحقيقات التي اشرف عليها المستشار اشرف حسن المحامي العام الأول لنيابات غرب الإسكندرية قد أكدت قيام كل من المقدم فؤاد وليم وأمين شرطة خميس محمد بمطار برج العرب بالإسكندرية بتسهيل هروب رجل الأعمال عادل جوزيف عادل لخارج البلاد عبر مطار برج العرب رغم صدور قرار من النائب العام بإدراج اسمه بقوائم الممنوعين من السفر لقيامه بالاستيلاء علي حوالي مليار و500 مليون جنيه من عدة بنوك .

وأكدت التحقيقات أن الضابط وأمين الشرطة قاما بإخفاء الكارت المثبت فيه منع رجل الأعمال من السفر مما مكنه من السفر إلي الولايات المتحدة الأمريكية بجواز السفر الأمريكي الذي كان يحمله .

تم ضبط الضابط وأمين الشرطة وأحيلا مع رجل الأعمال للمحاكمة بعد استكمال التحقيقات .

المصدر: وكالة انباء الشرق الاوسط

=====================================

تعليقى هو على طريقة التهريب (بإخفاء الكارت المثبت فيه منع رجل الأعمال من السفر ) وبما انى من بتوع الكمبيوتر والسيستم فهل موضوع الكارت ده يعنى ان الاجراءات تتم يدوياً؟ يعنى مجرد كارت يخفيه ضابط برتبه مقدم وأمين شرطة يتهرب مليار ونص مليون جنيه ؟ طيب ازاى

انا اتخيل كده ان النظام الصح يكون كالتالى ان الاسم الممنوع من السفر بيبقى نازل على سيستم فى جميع المطارات المصرية وعلى كل شركات حجز الطيران تعمل تأكيد قبل حجز تذكرة السفر عن طريق الدخول على الموقع الخاص بالسيستم ده وتشوف فقط هل الاسم ضمن قوائم الممنوعين من السفر ولا لأ ؟ وبناء عليه يتم الحجز من عدمه، وده يبقى اجراء تأمينى فى الدائرة الاولى بحيث لو فرض ان كان فيها ثغرة وتم الحجز فتعاقب شركة الحجز أولاً ويتم الانتقال الى الدائرة التأمينية التالية والخاصة بالدولة نفسها

بحيث ان اسم الممنوع من السفر كل لما يظهر على قوائم المسافرين الى اى بلد يتم رفضه على كل أجهزة المطارات من أول رئيس الميناء الى أقل فرد وياحبذا كمان لو حدث ترابط مع الوحدات التنفيذية والقضائية التى أصدرت قرار منع المذكور من السفر

مع ظهور عبارة

لنعيش عيشة فل لـ نموت احنا الكل ... انت ممنوع من السفر يا حبيبى مصر محتجالك

مش كده برضوا ولا ايه السيستم ....

وللعلم اللى عاوز يعلق على الموضوع يكون بهدوء .... غير كده بلاش

دول العالم الرابع

السلام عليكم ورحمه الله وبركاته

واحد صاحبى قالى ان فيه تصنيف جديد سيتم به اضافة عالم رابع
يعنى تبقى فيه
دول العالم الاول
دول العالم الثانى
دول العالم الثالث
دول العالم الرابع

مش عارف الخبر صحيح ولا لأ ؟
ولو صحيح طيب تفتكروا مصر هيكون لها نصيب فى العالم الجديد ؟
طبعاً محدش يفكر اننا هنطلع
احنا لو فضلنا ثالث يبقى كويس
على رأى الخيبانين كويس اننا مش فى المركز الاخير

ضربتو بالشبشب راح ضربها بالكوتشى

السلام عليكم ورحمه الله وبركاته

امبارح كنت راكب تاكسى وكان راكب جنبى واحد على يمينى وواحد فى الكرسى الامامى وسواق التاكسى
وقفنا فى اشارة فالراجل اللى جنبى كان عاوز ينزل فى الشارع المجاور للاشارة ففتح الباب مرة واحدة علشان ينزل من غير ما يبص وراه فطبعاً جت عربية بيجو 7 راكب ملاكى ودب خبطت فى الباب اللى اتفتح !!!!!
وكانت العربية يقطنها واحد اسمرانى كده ورفيع ومعاه واحدة ست وولد صغير
فالراجل اللى جنبى غلطان طبعاً لان أبسط حاجة كان يعملها انه يبص وراه قبل ما يفتح الباب فقولت هينزل يعتذر ولا يقول كلمة حلوة تهدى الراجل بتاع البيجو .........
لأ ازاى لازم فهلوة المصريين نزل وخدوهم بالصوت بعد ما بص بصة كده على العربية كويس وشاف ان فيها راجل واحد
الراجل بتاع البيجو بيقوله بكل أدب وصوت واطى وهادى كده هقولك ايه بس ولا اعملك ايه ؟ ومتأثر قوى وهو بيقولها وتحس كده انه غلبان ومفوض امره لله وخلاص ( قدر الله وماشاء فعل )
راح الغلطان اللى جنبى بزعيق وصوت عالى شوية وبعنف قاله تعملى ايه يعنى ايه عاوز تعمل ايه انت اللى جاى بسرعة وفتح الباب وبقى نصه بره فى الشارع وسايب رجله الشمال معايا فى العربية كده وعمال يشوح كأنه مش غلطان راح السواق بتاعنا لف له وقاله انت بتقوله جاى بسرعة ازاى يا بنى ادم والاشارة مقفولة انت اللى كان لازم تبص وراك وانت اللى غلطان
فبكل بجاحة قالوا لا انا بصيت وهو اللى كان جاى بسرعة والحقيقة انا كنت قاعد جنبه ومشفتوش بص ولا لأ ؟
فالناس سكتتهم هما الاتنين والاشارة فتحت والكلاكسات اشتغلت كأنها بمب العيد كل واحد ايده على الكلاكس مش راضى يسيبه كأنه لزق فى ايده
طبعاً انا قولت الموضوع خلص والناس سكتت الاتنين والراجل اللى جنبى لسه سايب رجليه جوه العربيه والكوتشى فيها منورها
-------------------------------------------
فاصل قبل المعركة
------------------------------------------
راحت الست البيجو
قصدى اللى كانت قعدة جنب الراجل فى العربية البيجو استلمت دور البطولة وابتدت هى تتكلم وياريتها كانت قعدت ساكتة ياريتها
عارفين لما تكون نار خمدت خلاص وخلاص هتطفى اهى خلاص ثوانى وتخلص
وانت تروح جايب بنزين وتحطه فوقيها اهو ده اللى حصل .... الست ولعتها لما لقت الراجل اللى كان معاها لم الموضوع
قالت للراجل الغلطان دى طبعا بعد لما نزلت من العربية ولفتله واخدت وضع استعداد وتشكيل هجومى ولا أروع من كده
قالتله ان بقى اللى هروح معاك فى اى خراراة تاخدك (خرارة = مصيبة ) ده احنا لسه مصلحين العربية
قالها تصدقى بقى انت ست مش تمام
قالتلوا انا مش تمام يا ............................... ويا ........... ويا .................................
ده انا هطلع دين .....................
قالها انتى هطلعى دين .....................
تصدق بقه انت راجل مش تمام لما تخلى الست اللى معاك هى اللى تتكلم وانت واقف كده ( ده الغلطان بيقول للراجل البيجو )
راح واحد بن حلال وقف بينها وفضل يهدى فيهم تانى راح الراجل الغلطان اخيراً طلع رجله الشمال من العربية ورجع للوراء شوية واخد وضع الاستعداد راحت الست قالتله انا اللى هضربك يا ......................
وراحت لفت لفة كاملة بسرعة شديدة الدوران حول العربية اللى انا فيها وقلعت الشبب وهى بتجرى عليه وهب
راح هو كمان قلع الكوتشى اللى كان فى رجله وهب
وهب
وهب
الراجل البيجو والراجل الغلطان والست ام شبشب متعرفش مين بيضرب مين

بصراحة كتر الف خيرك يا بنزين
قصدى
ياست

وطبعا العربية اللى انا فيها تم احاطتها من جميع الجهات بعيال صغيرة وعيال كبيرة ومحبى المصائب وشباب البلوتوث وكاميرات الموبيل والفضوليون وسواقين التاكسيات الخ الخ الخ وانتوا عارفين بقى المصريين والاشارة اتقفلت طبعاً والكلاكسات اشتغلت تانى
والعيال الصغيرة عمالين على صوت الكلاكسات يغنوا ويطنططوا وهوا هو وهوا هو
وهوا هو وهوا
هو وهوا هو وهوا هو
وكل لما واحد يشوف واحد فى الخناقة يقوله فيه ايه يلا مين بيتخانق معاك يقولوه مش انا ده واحد بيتخانق مع واحده ست
بس والناس سكتتهم وخلصت
------------------------------------
فاصل بعد المعركة
-----------------------------------
هى لو الست لو (لو يعنى ) سكتت كان حصلها حاجة !!!
صحيح هى ضربتوا بالشبشب بس هو برضوا ضربها بالكوتشى والراجل اللى كان معاها اخد كام بوكس وضربلوا كام بوكس وبعدين برضوا اتلمت ومشيوا !!! يعنى مكنش ينفع من الاول يا بنزين ....

ونستفيد من هذا الموضوع :-

• لما تيجى تنزل من العربية بص وراك الاول لمصلحتك ومحدش عارف البلد مليانة شباشب
• لما تركب عربية بيجو ما تركبش ستات معاك ولو ركبت ابقى طلع لسانها واربط عليه حزام الامان
• لما تلاقى الاشارة حمرا متوقفش احسن حد يخبطك من ورا امشى علطول وادعيلى ... ومتوقفش فى مزلقان فى مرسى مطروح أبداً
• لو انتى ست أحسن حاجة تعمليها فى المواقف دى تسكتى وتهدى جوزك وتدعي لجوزك ان الشيطان ميسطرش عليه
• الشبشب بيوجع اكتر من الكوتشى بكتييييييييييير يا رجاله ...... كان واضح على الراجل الغلطان كده
• اول لما تلاقى زوجتك ابتدت تكلم فى الخناقة سكتها ولم الموضوع وامشى لان كل الناس هتغلطك

نصيحة بجد بقى:-
قل أعوذ بالله من الشيطان الرجيم وربنا ان شاء الله باليقين هيرفع الغضب والشيطان عنك
كما بين النبى صلى الله عليه وسلم

نصيحتى لبنات مصر

لعبة ذكاء يابانى أصلى

السلام عليكم ورحمه الله وبركاته

جايبلكوا النهاردة
لعبة ذكاء تستخدم فى اختبارات الذكاء فى اليابان ( اليابان ها ) عند التقدم للوظائف او فى الدخول للجامعات
وتستخدم بشكل كبير فى مجال تكنولوجيا المعلومات او حقل IT
ويتم حل الاختبار ده فى ربع ساعة تقريباً
والاختبار عبارة عن 8 أشخاص على ناحية من النهر المطلوب من سعادتك تعديهم الناحية التانية من النهر ولكن بالاشتراطات التالية:-

1. شخصين فقط يمكنهم العبور فى المرة الواحدة
2. الاب مينفعش يقعد مع البنات الا فى وجود الام !!! ( أزمة ثقة مش اكتر ولا أقل )
3. الام متنفعش تقعد مع الاولاد الا فى وجود الاب !!! ( واحدة بواحدة )
4. البنت الحرامية مينفعش تقعد مع اى حد من الاسرة الا فى وجود الظابط ( يمكن علشان متفسدهموش )
5. اللى ينفع يسوق المركب هو الظابط والاب والام ( تحكمات الكبار مع ان المركب بيمشى لوحده )

اضغط على الشخص اللى عاوزه يركب وبعدين اضغط على الدائرة الحمراء لتقوم بتحريك العبارة
واوعى تغرق
ومتنساش حزام الامان
والصندوق الاسود بيسجل كل حاااااااااااااااااااجة

ملحوظة :- لازم يكون عندك اوفيس لان اللعبة معمولة على ملف اكسيل
حمل اللعبة من هنا
ها حد حلها
سلام

بست بست ... ارفع بنطلونك شوية !!!

السلام عليكم ورحمه الله وبركاته

هو موضة انك تلبس بنطلون وسطه ساقط علشان لامؤاخذه يبان ؟؟؟
بشوف شباب كتير لابسين بناطيل مهرهرة خالص وشوية وهتقع من على وسطه
وكل شوية يرفعها علشان يدارى لا مؤاخذه
ويفضل يشد فى البادى القصير برضوا يعنى بيشد من فوق ومن تحت علشان يدارى لا مؤاخذة
طب وعليك بايه ياعم الهم ده كله
دى موضه دى

مش عارف ليه حاسس انها موضة ناس لامؤاخذة شواذ جنسياً يعنى موضة منحرفة خلقياً وأنت راجل ومش بتاع كده صح ؟

البس بنطلون محترم وشكله حلو والبس بادى طويل وشكله حلو برضوا
صدقنى مش حتستفيد حاجة ان اى حد يشوف لا مؤاخذة ولا حد عاوز يشوف لا مؤاخذه

حتستفيد ايه لما تدخل تصلى لله عزوجل وتفضل طول الصلاة عمال تشد حبه فوق وحبه تحت وبدل ما تحط ايدك اليمنى فوق اليسرى على صدرك
تحط اليمنى واليسرى على البطلون لا يقع ولا حاجة وتفضل مكسوف ان مؤخرتك بتبان بداياتها وتشك فى صلاتك صحيحة ولا غير صحيحة
طب وعليك بايه ياعم الهم ده كله
انا فاكر ان أول بنطلون شوفته فى حياتى بالشكل ده كان على اتنين شباب كانا من ألبانيا كانا معانا فى جامعة حلوان سنة 97 او 98 وكانوا مسلمين بس شكلهم ساعتها كان فظيع ...
وكان فيه بنت فى الدفعة كل لما تشوفهم تقولهم بست بست أرفع بنطلونك شوية !!!!!!!!!!!!


واحد صحبى طبيب وأبوه دكتور جامعة قالى انه سأل أخوه (ثانوية عامة) هو بيشترى ملابس داخلية ملونة ليه (بوكسر) قالوا علشان أجيب بنطلون من اياهم ويبان البوكسر على الموضة ......
يعنى الموضوع بجد مقصود واللى بيعملوا عارف كده كويس لامؤاخذه
أعتبر الكلام ده من أخ
أعتبروا مرايتك وشاف فيك حاجة غلط وبينبهك ليها ومتخليش الشيطان يدخل بيننا
وربنا يهدينى واياك

تحديث للموضوع بتاريخ 17-7-2008
انا كنت بعمل بحث علشان اجيب صور للبنطلونات دى بس فوجئت بحاجة ان فى بلد فى احدى ولايات لويزيانا الامريكية
ايوة الامريكية
منعت البناطيل دى بقانون مش شفوى كمان
وادى نص الخبر
وبدأت محاولات منع هذه البناطيل من الشوارع تجتاح عدداً من المدن، إلى حد أن إحدى البلدات في ولاية لويزيانا
قررت حبس من يرتدي "البنطلون الساحل"، الذي يظهر الملابس الداخلية التحتية، مدة ستة شهور وغرامة قدرها 500

دولار، وفقاً للأسوشيتد برس

وهناك محاولات لفرض مثل هذه العقوبات في مدن أخرى، ففي ترينتون بنيوجيرسي، فالقبض على من يرتدي
هذا النوع من الأزياء يعني دفع غرامة كبيرة إلى جانب القيام بأعمال لخدمة المجتمع، كمساعدة عمال الخدمات
ونقل القمامة

وقالت عضو المجلس البلدي في ترينتون، آنيت لارتيغ، متسائلة : "هل هم موظفون؟ هل يحملون شهادة الدبلوما؟
إن القرار طريقة رائعة لإعادة توجيههم إلى الطريق الصحيح.. والرسالة واضحة : نحن لا نريد رؤية خلفياتكم!"

يشار أن الاعتقاد السائد هو أن هذه الموضة بدأت في السجون، حيث لا يُسمح بإعطاء السجناء حزاماً مع البنطلون
الواسع والفضفاض لمنع السجناء من الانتحار أو ضرب زملائهم.
انتهى الخبر
واحنا فى بلاد عربية اسلامية محدش حاول يفتح فمه بكلمة عن هذه البناطيل القذرة
يعنى لو مكنش من ناحية الدين
يبقى على الاقل من ناحية الرجولة والاخلاق والحياء
وبعدين يقولوا النقاب مش من الدين ....... هههههههههههههههههههه
يعنى تستروا نفسكم مش هنسبكوا وهنفضل نهاجمكم ونتكلم عنكوا
اما لو تتعروا وتبينوا ملابسكم الداخلية وأشياء اخرى نسبكوا فى حالكوا ونغض الطرف عنكم
حكم

هو فيه حد ممكن يعمل كده ؟

السلام عليكم ورحمه الله وبركاته
هو فيه حد ممكن يعمل كده ؟

انا شفت الصورة دى فضلت أضحك وأستغرب
بس قلت طالما جت فى دماغهم
يبقى فى حد عملها قبل كده

اتفرج واحكم بنفسك !!!

جودة خدمات المحمول عن الربع الأول من العام 2008

السلام عليكم ورحمه الله وبركاته
جودة خدمات المحمول عن الربع الأول من العام 2008


قام الجهاز القومى لتنظيم الاتصالات بالإعلان عن نتائج قياسات جودة آداء شركات المحمول عن الربع الأول للعام 2008 ، ويقوم الجهاز بهذه القياسات بشكل دورى للتأكد من مطابقة الخدمات للمعاير و المقاييس المقررة من قبل الجهاز .
وتمثل قياسات جودة الخدمة تفعيلاً لدور الجهاز الرقابى ، و تأكيداً على دعم الجهاز لسياسات المنافسة الحرة والشفافية . ويقوم يتنفيذ تلك القياسات الميدانية فريق متخصص من خبراء ومهندسى الجهاز و تشمل المناطق المحددة بالتراخيص الممنوحة لشركات التليفون المحمول فى أوقات الذروة و على مستوى الشوارع الرئيسية و الفرعية و خارج الكتل الخراسانية .
وقد اشتمل التقرير على قياسات فى خمسة أقاليم رئيسة هى : القاهرة ، الأسكندرية ، اقليم القناة ، أقليم الصعيد، أقليم الدلتا ، فى محاولة لوضع صورة واضحة أمام المستخدم عن جودة الخدمات المقدمة من شركات المحمول المصرية .
ويهدف الإعلان عن هذه التقارير الى تحفيز الشركات من أجل تحسين الخدمات المقدمة للمستخدم ورفع كفاءتها وهو ما يصب فى النهاية فى صالح المستخدم بشكل خاص و السوق المصرية بشكل عام .
جدير بالذكر أن الجهاز يحرص على تطوير قدراته التقنية بشكل دورى و بصورة تتوائم و الطفرات التكنولوجية العالمية وهو ما يسمح

له بالقيام بمثل هذه القياسات بشكل دورى ودقيق

القاهرة - الاسكندرية - القناة وسيناء - الصعيد - الدلتا

القياسات على الرابط التالى:-

http://www.4shared.com/file/53829561/e4ff5df0/Ntra.html

تصوير محاولة انتحار مواطن مصرى

السلام عليكم ورحمه الله وبركاته
الصور دى استلمتها من مجموعة البركان على ياهو وهى تصوير لمحاولة انتحار شاب مصرى فى دبى


وصاحب الموضوع كاتب هذا الكلام تعليقاً على الصور


" مد له يده بـ 1000 درهم فغير رأيه
انتحار في دبي
اليوم واحد من الاخوه العرب { المصريين} بغى ينتحر
ووقف على طرف عماره أمام ديوان الحاكم في دبي لكنتدخل الظابط الشجاع سعيد بن دلموك من شرطه دبي
وأقنعه بالعدول عن الانتحا ر والنزول…صدق أنقذ حياته والله الواحد يفتخر
بأنه في ناس ماتقصر في شغلها"

اليوم 13-12-2008
أخ بعث لى تصحيح للخبر انه الشاب جنسيته سورى والخبر نازل على موقع محيط