السلام عليكم ورحمه الله وبركاته
خبر يوم 30-8-2008 من موقع مصراوى
كشف وزير الاوقاف عن نجاح 2359 داعيا وواعظا فقط فى المسابقة الاخيرة التى اجرتها الوزارة لاختيار أئمة جدد من اجمالى 18400 تقدموا لتلك المسابقة ،
يعنى 18400-2359=16041
يعنى نسبة الرسوب 87.2%
نسبة النجاح 12.8%
موضحا أنه سيتم الاعلان عن مسابقة اخرى لاستكمال العدد المطلوب الذى تعينه الوزارة سنويا وهو 3 الاف داعية ، وأرجع ذلك الى توسع قاعدة المتقدمين لتلك المسابقة من خريجى مختلف الكليات الشرعية والعربية بعد ان كانت مقصورة على كليتى اصول الدين والدعوة الاسلامية ولعدم معرفة المتقدمين بالاسس المطلوبة لعمل الدعاة.
لما عرفت الخبر ده ساعتها مجاش فى دماغى غير واحد وبس وهو إمام مسجد قريب من بيتى والذى يعتبر من أكبر المساجد الموجودة بالمحافظة وانا متأكد من أنه لو تم اختباره فى اى فرع من فروع الدين سوف يرسب وبشكل مهين ؟
فلماذا لا يتم اختبار الائمة الموجودين حالياً بالمساجد فى كل فترة لتقييمهم لان وظيفة الامامة تتطلب ان يكون الامام بشكل دائم مطلوب منه أداء مهام وظيفته فلا يعقل ان يطلب الامام بشكل دائم من أحد المصلين ان ينوب عنه فى الامامة والسبب معروف لانه لا يحفظ ما يستطيع ان يصلى به ولا يعرف أ ب تجويد !!! فكيف لا يملك الموظف أدوات وظيفته ؟ كيف يستحل راتبه اخر الشهر ؟
لماذا لا يتنازل عندما يجد انه قد أصبح غير مناسب لمكانه ؟
واتحدث عن وظيفة الامامة بشكل خاص نظراً لطبيعتها الدينية قبل الدنيوية ؟
اتخرج ازاى ده من الكلية ؟
كيف يتحمل ان يصلى بالناس وهو يعلم ان معظم من خلفه يكرهون امامته ؟
الاختبار للأئمة الحاليين لو نظرت له هو مطلب عادى جدا جدا والكويس هيخاف من ايه ؟ فلو اختبرت اى واحد فى شغله وطلع مبيفهمش حاجة فى شغله يبقى هو اللى غلطان وهو غير مناسب فى موقعه !!! يعنى مينفعش سواق أتوبيس يبقى أعمى !! صح
ومتقولش معلش أصله عنده عيال ورتب حياته انه يبقى فى المكان ده ودخل ولاده المدارس القريبة من المسجد ورتب حياته على كده خلاص !!!
لما الوزارة تختبر إمام المسجد فهى بتفيده مش بتضره هى بتحفزه انه يظل طوال عمره يراجع على القرآن ويحفظ ويتعلم مش يبقى زى اى وظيفة اتخرج من الكلية بعد لما حفظ كلمتين علشان الامتحان وراح كتبهم فى ورقة الاجابة ونجح وبقى إمام مسجد ويظل طول عمره نايم فى الفيلا اللى عملتهالوا وزارة الاوقاف داخل المسجد وشوية شوية ينسى اللى اتعلمه ده لو أصلاً كان فاكر حاجة
ممكن يقسم راتب الامام الى ثلاث أقسام:-
قسم خاص بحفظ القرآن الكريم كاملاً
وده الغالب ان مع أول امتحان نسبة كبيرة جداً من الائمة الحاليين هيتخصم منهم وهيكون حافز للمجيدين منهم انهم يحفظوا ولو مش علشان ربنا يبقى علشان الفلوس وممكن فى أضعف الايمان ان اللى خاتم يأخذ فلوس هذا القسم كله والاقل يأخذ أقل وهكذا ويخصم كله من التعبان خالص
قسم خاص بالخطابة والنواحى الشرعية الاخرى
كافة فروع العلم عدا التجويد
قسم خاص بالاشراف على المسجد من النواحى الادارية
زيارات مفاجئة من الاوقاف على المسجد وخلافه وأحب أوضح ان امام عينى حدث الموقف التالى بنفس المسجد المذكور :-
حضر مفتش من وزارة الاوقاف بين الاذان والاقامة فى صلاة العشاء ودخل وأشار للامام من بعيد بالحضور اليه ثم جلس على مقربة منى وطلب من الامام ان يحضر الدفتر ويحضر كل العاملين بالمسجد علشان يعرف مين اللى حاضر من اللى مزوغ وفوجئت بحضور واحد لابس جلابيه كده وعرفه امام المسجد انه عامل بالمسجد تعرفوا ده مين بتاع محل الخضار اللى جنب المسجد !!!
فحتى عند وجود المفتش ووجود الخطأ لم يكتشف لان الدفتر بالاسماء فقط مش بالصور للعاملين وكمان إمام ..........ربنا يهديه ...
وأنت ايه رأيك فى الثلاث أقسام دى ؟
انا كنت أخدت كورس قبل كده فى المعادى والدكتور اللى كان بيشرح الكورس كان من ضمن المجموعة اللى كانت بتعمل خصخصة للمصرية للاتصالات وكان بيقول أنهم مش عارفين يعنى ايه مثلاً مدير كذا أو رئيس قطاع كذا فى المصرية للاتصالات يعنى بيعمل ايه بالضبط علشان يشوفوا ايه الهيكل والوظائف اللى هما عاوزينها فقالوا خلاص يعملوا خطاب لكل واحد من الموظفين دول يجاوب هو بنفسه عن التوصيف الوظيفى لعمله 
